Wednesday, April 3, 2019

RTP NANGUP PEMINTA RABAN NEMBIAK



SRI AMAN: Pengawa ngaga gelanggang futsal beperabung RPR Taman Sentosa Indah enggau gelanggang bola keranjang beperabung RPR Taman Sentosa dikena nangkup peminta raban nembiak ti deka bejalaika aktiviti lumba enggau main bol.

Menteri Muda Pengelantang Komuniti ke nyadi ADUN Simanggang Datuk Francis Harden Hollis mansutka jaku tu lebuh bejalai ngabas kededua taba projek di baruh Program Transformasyen Menua Pesisir (RTP) Simanggang ditu, kemari.

Kenu ku Harden, pemisi palan belepa enggau lumba tu deka meri pemaik ngagai komuniti menua nya kelebih agi raban nembiak.

“Aku ngarap perengka guna tu deka meri pemaik ngagai bala nembiak, ngisi awak lepa sida ngena aktiviti ti manah pulaika pengerai tubuh sereta ngansak penau dalam lumba kelimpah ngerapitka tanggam kaul bala komuniti,” ku iya.

Iya madahka, ngaul diri ba pengawa lumba ulih nyeliahka bala nembiak ngereja ulah enda menuku baka salah guna dadah.

Gelanggang futsal beperabung RPR Taman Sentosa Indah diangkat manah enggau pangau, pagar ngelingi, agu enggau nangkir perabung nengah projek pemansang renggat II.

Harden mega bisi bejalai ngabas Balai Mayuh Guna Kampung Muhibbah ke diatu manggai 99 peratus tembu.

Caption gambar :

NGABAS.. Harden disempulang bala bukai ngabas taba projek RTP kemari.

No comments:

Post a Comment

Loading...