Hari Krismas pelasar endur nempa penyerakup, ngerapitka kaul






MIRI: Pengerami Krismas nyadi pelasar nempa penyerakup enggau ngerapitka agi kaul rayat pupu bansa di Sarawak nengah pengerami nyambut pengabang ninting taun.


Kaban Kunsil Nengeri (ADUN) Telang Usan, Dennis Ngau madahka Sarawak ke diuwan pupu bansa enggau pengarap, pengerami Krismas mayuh agi ngasaika reti iya lalu patut ditunda.

“Bida ba pengarap enda nekul pengawa ngusung pangan diri, duduk enggau makai semija, begulai bebaik,” ku iya madah ngagai Utusan Borneo kemari.

Dennis mega bisi bekunsika peneleba iya empu pasal ngintu pengerami Krismas begulai enggau pupu bansa ti bebasaka pengarap pangan diri.

“Pengerami nerima pengabang ngerapitka agi kaul enggau pangan diri, lalu pengawa tu ukai semina ngerichahka agi pengerami aja, tang mega neguhka agi tanggam kaul mensia,” ku iya.

Semua pengarap ngajar kitai pengawa ke manah lalu pekara ti beguna endar pemereti ati enggau chara patut pragmatik laban pekara ti nyata iya nya peranak menua tu datai ari gempung ke sama.
“Nadai ngira pengarap Kristian, Islam, Hindu tauka ke bukai, kitai tetap sama dalam siti ‘rumpun’ sereta mega bebasaka pangan diri enggau nadai penangi,” ku iya nerang.

Dennis mega ngelalau sida ti mulaika diri ke menua nyerumba Krismas tu ngambi nentuka diri udah meresa entukar sereta merambu atur pejalai enggau manah.

“Kitai nemu mayuh sida ke gawa di mengeri udah mupuk mulaika diri ke menua minggu tu lalu aku ngarapka sida deriba enggau likun sereta nitihka atur trafik,” ku iya.

Dennis mega meri jaku selamat Hari Krismas ngagai semua orang Kristian lalu ngarapka pengerami tu ulih nyadi kelai penyerakup sereta ngenegutka pemereti ati bansa.
UtusanBorneo

Facebook Comment