IPT dipinta nempa mayuh agi graduet bidang IT

 

Kepala Menteri Datuk Amar Abang Johari Tun Openg dekaka palan pelajar tinggi (IPT) ngemansut mayuh agi graduet bidang teknologi komputer.

Ku iya, penau ba bidang nya berat ketegal dunya diatu udah ngalih ngagai digital ekonomi lalu seriris enggau kuing Perintah Nengeri ti deka bela ngalih ba pekara ekonomi nitihka singkang menua maju bukai.

Nitihka pansik ke dipejalai dalam timpuh 2013 nyentuk ngagai 2017 ku iya, graduet ti diguna ba bengkah penau ICT mengkang kurang ba ikas 5,000 nyentuk ngagai 7,000 iku.

“Bepelasarka pansik ke diadu THe Manpower Group’s Talent Shortage ba taun 2015, orang ke landik ba IT ba penuduk lumur lima ba bengkah raban orang ke mar digiga ngisi pengawa puang dalam kandang Asia Pasifik,”ku iya.

Abang Johari mansutka jaku nya ba pengawa bejadi Big Day In Sarawak-Universiti Teknologi Swinburne Kampus Sarawak ditu, kemari.

Iya nambah, nengah kuing Sarawak ti deka nuju digital ekonomi, raban nembiak nengeri tu diperansang ngambi bengkah pelajar ke bekaul enggau IT.

“Ketegal perintah enda ulih ngemujur juluk tu kediri, kitai ngansak raban gerempung ngadu kerejasama enggau sekula enggau pelajar tinggi.

“Kelimpah ari nya, palan pelajar tinggi patut nyendia skularship ba sentang pelajar IT ti tau matak pengerindu nembiak ngambi bengkah pelajar nya,”ku iya.



Facebook Comment