UPP ngarap diberi awak bediri baru ba DUN Pujut



Parti Rakyat Sarawak (UPP) kemari udah ngelancharka bilik operasyen pengawa bepilih dikena ngerampas baru penuduk Pujut ari penyakal seraya neju ngagai Kepala Menteri milih ni bagi chalun ti pemadu bepenau ngarika Barisan Nasional (BN).

Presiden iya, Dato Sri Wong Soon Koh madahka injin parti udah sedia lalu ngarapka UPP diberi awak baru bediri minta pilih ba Pujut lalu madahka parti nya deka gawa bebendar nyapai juluk tu begulai enggau parti komponen BN.

Iya mansutka pekara tu rambau aum pengarang berita ke mega digulu Sapit Presiden parti, Dr Jerip Susil, Sekretari Besai UPP George Lo, Chairman UPP Pujut Bruce Chai, Chariman UPP Senadin

Keith Chin, Chairlady Sayap Indu Senadin Suzanne Hii enggau Ketuai Nembiak Lawrence Kong sereta Yaw Min Wai, Chairman UPP Bekenu.

UPP melabaka Chairman BN Sarawak enggau Kepala Menteri Datuk Amar Abang Johari Tun Openg deka mantaika chalun BN Pujut dalam minggu tu.

“Nyema diberi awak bediri baru, kami deka gawa siang enggau malam nentuka pemenang BN.” ku iya.

Tang ku iya, taja BN di Pujut napi pemar dalam pengawa bepilih tu, parti udah sedia ba semua jalai ngerampas pulai baru penuduk ungkup BN, madahka penuduk ulih dimenang enggau urung 30 peratus pengundi Bumiputera sereta undi bansa China ngagai BN.

Wong nandu peminta iya ngambika parti komponen BN bediri tegap di belakang barang sapa ti dipilih nyadi chalun BN ba pengawa bepilih Pujut seraya ngapil sukung parti iya ngagai chalun BN.

UPP udah nganjung rintai nama chalun ditaga ulih menang ngambika dipilih sereta nejuka pemutus ngagai bala ketuai BN nengeri berunding sereta milih chalun ti patut.

Ngelansa pasal pemuang penuduk berindik ari mosyen iya ngujungka kaban kunsil nengeri ti dipilih Dr TingTiong Choon ari Parti Tindakan Demokratik (DAP) ditingkil, ku iya, tu belalauka konstitusyen nengeri ba pekara peranak chalun ti dipilih lalu nama iya dalam rejista insolvensyen.

“DAP nyabung chalun ti enda patut disabung, lalu ukai aku ti ngenukuka iya tu bankrap laban nama iya kala dikenu bankrap. Tu bepanggai ba iya empu mantaika diri pansut ari nya,” ku iya.

Sentang perambu Dr Ting ti deka bejalaika atur undang-undang ngelaban iya, Wong madahka nya hak demokratik iya lalu iya deka ngasuh piak bekuasa pekara wang Australia ngenuku sekalika amat atuka enda ex-ADUN nya bankrap tauka enda.

“Aku ukai ngasuh DAP tu bulih perati, nempa isu tauka ngasuh orang sinu ati – lalu tu chara ti suah dikena penyakal nginti sukung tauka tuju politik,” ku iya.

Rambau pengawa ngelanchar palan operasyen pengawa bepilih, iya madah milih chalun ari UPP endang patut laban bala ketuai menua nya, nyengkaum Chairman UPP Pujut Bruce Chai, udah bebendar gawa ba renggat pun menua sereta udah ngabas 10,000 ruang bilik.

“Barang sapa dipilih bala ketuai tetinggi BN, kami deka nurut tang aku ngarapka bala kami deka diberi awak,” ku Dr Jerip.

Kami udah ngereja mayuh macham pengawa di pun menua ke alai kitai udah mujur mutarka mayuh isu. Kami deka terus nguji mutarka penanggul enggau pemar ditapi peranak di Pujut,” ku iya.

Bruce madahka parti nya udah ngerembai kenyau ari taun 2000, lalu kaul injin pengawa bepilih parti agi teguh enggau bala ketuai sereta kaban ari Bekenu, Senadin, Pujut enggau Piasau, ti udah ngaul diri dalam pengawa bepilih di Pujut rmabau pengawa bepilih nengeri suba.

“Kami udah sedia. Kami deka gawa ba tikas 100 peratus ngagai 110 peratus,” ku iya.
Keith enggau Suzzane bela setujuka penemu tu sereta bisi pengandal.
Borneo post


Facebook Comment