Komuniti Dayak patut terus nyukung perintah


KUCHING: Komuniti Dayak pechaya Kepala Menteri Datuk Amar Abang Johari Tun Openg bisi pengandal ngagai ketuai ari komuniti tu disengkaum dalam agenda pemansang strategik menua.

Sapit Speaker DUN, Dato Gerawat Gala madah komuniti Dayak ngembuan dua iku sapit kepala menteri, iya nya Datuk Amar Douglas Uggah Embas enggau Tan Sri Datuk Amar Dr James Masing.

Iya madahka, ukai semina nya aja, kededua sapit kepala menteri tu diberi tanggung pengawa enggau portfolio ke engkeman dalam pengawa sida iya ngemansangka sitak menua pesisir, alai majoriti ke nguan sitak menua nya, komuniti Dayak.

“Mayuh program enggau inisiatif ti digaga ke sitak menua pesisir, ngipak enggau komuniti Dayak.
“Ambika chunto, kelimpah ari portfolio ke engkeman nya, komiti kabinet khas tanah Hak Adat Bumiputera (NCR) betuaika Uggah udah ditumbuh dikena mutarka penanggul bekaul enggau tanah.

“Lalu pia mega enggau penumbuh Unit Pekara Ukai Bekait enggau Islam, alai pemisi unit tu mandangka perintah ngelala sereta bebasaka pengarap di menua tu.

“Berindik ari nya, komuniti Dayak patut terus meri sukung penuh sida iya ngagai perintah ti betuaika Kepala Menteri,” ku iya.

Iya madah munyi nya lebuh bejaku ba atur pengawa Nyambut Pengerami Hari Gawai Dayak 2017 Renggat Menua di sebengkah hotel ditu, malam kemari.

Gerawat ti mega nyadi chairman komiti kereja atur pengawa pengerami nya nandu baru madahkla, dalam kitai meri sukung penuh nengah betuaika Kepala Menteri, komunit Dayak patut majakka pengawa sereta penyereta sida iya dalam Perintah.

Dalam timpuh nya mega, komuniti Dayak mega ngarapka pengelandik ketuai ke ngiring nengeri tu beratika semua pemansang ke semua komuniti dipajakka.

“Ngarika raban komiti pengerami tu, aku meri terima kasih ngagai semua kita ke udah ngemujurka atur pengawa tu.

“Baka pengerami ke udah, atur pengawa tu betuju begulai ngerami pemujur Dayak enggau jaku rambai “Segulai Sejalai: Transformasi Ke Arah Era Digital”.

“Pengerami tu tu mega betuju mandangka pengeraja sereta mayuh macham main asal komuniti

Dayak ari pupu bansa Iban, Bidayuh enggau Orang Ulu,” ku iya.

Dikena ngeramika atur pengawa nya malam kemari, sida pengatur bisi mega ngatur ‘Gawai Bazar’ sereta pengawa pemandang sereta nyual asil kraf jari sereta pemakai tradisional.

Sekeda raban musik tradisional Orang Ulu sama bisi dibai datai ari Belaga, iya nya Jatung Lutang, Bamboo Band ari Lawas, pemain sape, artis sereta pengajar ngajat ari Yayasan Budaya Sarawak, Kampung Budaya Sarawak sama bisi mantaika pengelandik sida mandangka ajat asal.
UtusanBorneo

Facebook Comment