Pemujur dijapai KM dalam 100 hari dipuji bala ketuai



Sapit Kepala Menteri Sarawak, Tan Sri Datuk Amar Dr James Jemut Masing madahka dalam kandang 100 hari, Kepala Menteri Datuk Amar Abang Johari Tun Openg mujur ngereja pengawa baka pengawa dikereja ketuai bukai ba Malaysia ti nguna timpuh betaun pengelama.

Iya muji Abang Johari ti ngeletakka pekara pemun tegap ke ngujungka nengeri tu jampat mansang ngagai tikas ke menyana agi.

“Abang Johari chukup jampat mai Sarawak mansang. Dalam kandang 100 hari, iya mujur ngereja pengawa baka ti dikereja ketuai bukai ba Malaysia tu dalam timpuh betaun pengelama.”

“Iya baka orang ti berumban, nya endang patut,” ku Masing madah ngagai The Borneo Post lebuhka dipinta meri timbal sentang Abang Johari ke udah 100 hari mangku pengawa nyadi kepala menteri.

Abang Johari berengkah ngiring Sarawak kena 13 Januari pengudah pemarai Kepala Menteri kelima, niang Datuk Patinggi Tan Sri Adenan Satem kena 11 Januari. Manggai 100 hari Abang Johari mangku pengawa kena Hari Enam tu tadi.

Masing madahka Sarawak udah jauh tinggal lalu Abang Johari udah ngelengkaska pemansang, nya alai mayuh udah dijapai iya dalam kandang 100 hari tu.

“Sarawak udah lama dikemelu, ditinggal sereta enda dikeibuh perintah besai kenyau 50 taun nyentuk datai ba pegai Menteri Besai Datuk Seri Najib Tun Razak kediatu.”

“Pengudah iya (Abang Johari) megai ulu, iya terus gawa. Dalam kandang 100 hari iya udah nempa ekonomi digital enggau Bank Pemansang Sarawak (DBOS) lalu iya udah ngambi Tekat Ai Hidroelekterik Bakun.”

“Kesemua japai tu, deka ngasuh juluk pemansang nyadi nyata.”

“Nya alai, seagi iya begunaka aku, aku endang deka nyaup iya nempa Sarawak menyana agi ungkup rayat,” ku Masing ke mega Menteri Pemansang Infrastruktur enggau Pengangkut.

Udah nya, Sapit Kepala Menteri Sarawak Datuk Amar Douglas Uggah Embas mega muji Abang Johari laban nampung polisi transformasyen menua pesisir.

Ku Uggah, transformasyen menua pesisir udah dikemerat ba agenda Abang Johari.

“Pekara tu udah dipeda ari inisiatif menua pesisir ti udah dipejalaika kitai. Inisiatif menua pesisir baka pengawa numbuhka Serikat Eksport Produk Betanam Betupi Sarawak (Serikat Eksport) ti endang ari buah penemu iya,” ku Uggah ke mega Menteri Betanam Betupi Moden enggau Ekonomi Menua Pesisir.

Ku iya, Serikat Eksport tu ukai semina deka megai tanggungpengawa eksport produk betanam betupi Sarawak ngagai makit menua tasik aja, tang mega deka nentuka bekal ti chukup ba produk betanam betupi ulih kereja rat begulai enggau pekebun mit enggau mega pengempu kebun dandang besai.

“Iya mega deka ngelakuka/meransang pengawa ngena teknologi ke pemadu baru dalam pengawa betanam betupi nengah penyereta puku/belanja. Enggau chara tu, kitai ngajar rayat kitai ti bumai.”
“Kitai deka ngajar sida ngena nginti ari ke meri sida ikan, lalu nunjukka sida baka ni ngena teknologi,” ku Uggah.

Ku iya, udah nyadi langgur penemu Abang Johari ke alai pengawa betanam betupi endang patut dikemansang nitihka pemansang teknologi.

“Nya kebuah iya deka bisi sambung internet ke laju agi di kandang menua pesisir enggau naka penyampat.Iya ukai semina deka nyadi jematan ba pengawa magi digital antara mengeri enggau menua pesisir, iya mega deka ngurangka tikas penyeranta.”

Uggah madahka Abang Johari tu seiku ketuai ti pintar runding nemu nama pengawa ke patut digaga.
“Iya nemu nama pekara ti patut digaga diatu, iya megai nengeri sereta gawa nentuka juluk ati iya nyadi nyata,” ku Uggah.

Uggah mega muji Abang Johari ba pemanah tanggam kaul iya enggau perintah besai ti meri asil ba pengawa meli Tekat Ai Bakun sereta numbuhka DBOS, ke alai nyadi pekara beguna endar ngagai Abang Johari neruska juluk iya.

“Tekat Ai Bakun deka nyediaka kuasa dikena mintas ngagai ekonomi digital sereta pemansang teknologi seraya bank deka melanja sebarang projek ti deka ngeyampatka pemansang kitai.”
“Deka mayuh agi pekara bukai dijapai udah tu,” ku Uggah.

Berebak enggau nya, Menteri Kaunsil Kandang Menua Datuk Dr Sim Kui Hian madahka Abang Johari ti nyadi ketuai ti tebuka sereta manah, endang nadai agi napi pemar ngulihka sukung ari bala pengundi China.

“Abang Johari mujur ngayanka penau diri, baka niang Adenan ke nyadi kepala menteri ungkup semua, nampung pengawa ngungkupka belanja ngagai sekula China,” ku Dr Sim.

Iya belalauka semaya niang Adenan ti meri RM3 juta dalam taun 2014 ngagai sekula peribit China lalu nambahka penyampau nya manggai RM1 juta tetiap taun dataika 2016, ke alai iya ngungkupka RM5 juta.

Nitihka singkang niang Adenan, Abang Johari meri RM6 juta.

“Kelimpah ari ngungkupka belanja ninting taun ngagai sekula peribit China, Abang Johari mega nampung polisi dipejalaika niang Adenan ba pengawa ngambi bansa China gawa perintah ba nengeri tu.”

Dr Sim besetuju enggau pengawa ngadaka DBOS sereta meli Tekat Ai Bakun ari pengawa ngulihka kuasa ba pekara belanja.

Iya mega muji Abang Johari ketegal pemintar ba penetap iya dalam Rang Undang-Undang Kort Syariah (Akta Kesalahan Jenayah 1965), ke suah agi dikelala RUU355.

“Penetap Sarawak ba Akta tu ngujungka rang undang-undang puntan dibantaika nyadi rang undang-undang perintah. Bala kaban parlimen (MP) Sarawak diatu bediri tegap nyadi MP enggau prinsip lalu semua tu bepun ari Abang Johari,” ku Dr Sim.
Borneo post


Facebook Comment