Parti PBB deka ngatur Gempuru ‘Jasamu Dikenang’



Parti Pesaka Bumiputera Bersatu (PBB) deka ngatur Gempuru ‘Jasamu Dikenang’ ungkup tiga iku raban ketuai tebilang parti ba awak ke semak.

Aum keterubah sentang pengawa nya udah diatur di Indu Opis PBB di Jalai Bako, lalu digulu Sapit Presiden PBB Datuk Amar Douglas Uggah Embas.

Bela ngulu aum iya nya Sapit Presiden Datuk Amar Awang Tengah Ali Hassan, Sekretari Besai PBB Dato Sri Dr. Stephen Rundi enggau raban ketuai PBB ke bukai.

“Penerang ke silik sentang gempuru sereta maya diadu deka dipansut ba aum ti deka datai iya nya kena 27 April tu,” ku Uggah nyaut pemberita kilah ensana.

Nitihka penerang ari seiku ketuai ke ngulu aum nya, Gempuru ‘Jasamu Dikenang’ diatur kena meri basa sereta ngenang tiga iku ketuai tebilang PBB.

Tiga iku ketuai iya nya Pehin Sri Abdul Taib Mahmud (Tuai Pemegai Menua, TYT), Kepala Menteri Ke 5 Niang Datuk Patinggi Tan Sri Adenan Satem enggau Datuk Patinggi Tan Sri Alfred Jabu (ex-sapit kepala menteri).
Borneo Post

Facebook Comment