Sebelas Iku Pemesai Imigresyen Sarawak Diriman Ketegal Kes Makai Suap



KUCHING: Kort Majistret Kuching ensanus ngeluar perintah riman tujuh hari ngagai sebelas iku pemesai Imigresyen Sarawak ngambi ulih mantu tasat kes ke bekaul enggau makai suap.

Perintah riman nya dikeluar Majistret Zulhairil Sulaiman pengudah pinta reman dikenatai Pemesai Pengawa Tasat Komiti Penyeliah Pengawa Makai Suap Malaysia (SPRM) Mohd Asri Abu Bakar.

Semua sebelas iku pemesai Imigresyen, iya nya lima lelaki enggau enggau enam iku orang indu dibai tama kort urung jam 9.00 pagi lalu pansut sejam pengudah nya.

Semua sida sebelas iku diriman nyentuk ngagai 22 Mac tu.

Ba operasyen ke diadu ensanus, semua pemesai nya ditan bapalan ke bebida, nyengkaum di Indu Opis Imigresyen Sarawak, Palan Penerebai Bilun Antarabansa Kuching enggau Opis Imigresyen Pending di Kuching sereta Palan Ngetan Depot Semuja, Serian.

Semua saspek beumur entara 33 nyentuk 53 taun lalu disangka nerima duit suap entara RM200 nyentuk  RM5,000 ngambi nyelalai peranak menua luar ke tama enggau nadai surat penerang sereta permit gawa ke sah.

Ba operasyen nya, SPRM bisi mega ngerampas duit urung RM10,000 ari seiku suspek ke ditan.

Kes ditasat nengah Seksyen 17 (a) Akta SPRM 2009 ke tau diukum nengah Seksyen 24 akta ke sama lalu tau diukum jil enda ngelui 20 taun sereta ukum mata duit lima kali lipat ari penyampau duit suap.

Ngenang kes ke sama, Direktor Tasat SPRM Datuk Simi Abd nengah seiti penerang kemari enda nyangkal mayuh agi deka ditan bekaul enggau kes nya.

Ku Simi, penatai orang gawa ari menua luar ukai semina ngeruga pengelikun mensia mayuh enggau menua, tang bela ngasuh kes penyalah jai niki di nengeri tu.


 

Author:

Facebook Comment