Pengurang nyadika peransang ngagai Suzzane nyapai penyulut



KUCHING: Pengurang ba diri empu ke diasai seiku chalun ‘Berkeperluan Khas’ Kategori ‘Kurang Upaya Penglihatan’ (Rabun), Suzzane anak Jelian ari SMK Batu Lintang mujur nyadika peransang nyentuk iya tejapaika pemutus peresa Sijil Pelajaran Malaysia (SPM) ke nyulut lebuh pemutus peresa nya dibantai kemari.

Kekadang Suzzane kala berasai malu ketegal pengurang diri laban orang bukai ke ngelinggi baka enda ulih nerima pengurang sereta enggai bebakih enggau iya.

“Sigi bisi orang ke enda ulih nerima penanggul aku laban pengurang aku,  sigi pedis ngiga bakih ke ulih dibai begulai. Taja sida enggai begulai enggau aku, aku tetap neruska pengawa aku empu,” ku ku Suzzane.

Suzzane asal ari sebengkah rumah panjai di Batu 19, Jalai Oya Sibu kala besekula ba SMK  Batu Lintang ngambi bidang Sastera  napi penanggul rabun kenyau ari mit, lalu maya iya besekula primari nyentuk sekondari, sigi iya dianjung ngagai sekula ‘khas’.

Lebuh ditanya ngagai iya, bakani ku chara iya belajar sebedau peresa SPM ngujungka iya bulih pemutus peresa ke manah, ku Suzzane:

“Aku sigi seruran belajar kediri (ulangkaji), macha bup, sereta seruran mendingka ajar pengajar. Kelimpah nya, kami sigi bisi belajar beraban (study group),” ku iya ke chukup rinduka subjek Bahasa Melayu.

Ba pemutus peresa SPM tu tadi, Suzzane bulih 2B, 2D, 1E enggau 1C alai Bahasa Melayu B+ (Kepujian Tertinggi), Bahasa Inggeris D (lulus atas), Pendidikan Moral B+ (Kepujian Tertinggi), Sejarah D (Lulus atas), Matematik E (lulus) enggau Sains C+ (lulus atas).

Suzzane, anak tuai ari tiga iku diri menyadi, sereta anak seiku mandor ke gawa ba kebun besai, enda ngadang bulih pemutus peresa ke nyulut. Berindik ari nya, iya meri terima kasih ngagai apai indai iya, ke seruran meransang iya belajar bebendar.

“Nangkan tu ila, enti ulih aku deka masuk Pom Enam tauka  UNIMAS enti diterima,” ku iya, ke ngembuan juluk deka nyadi Kaunsilor jemah ila.

Lebuh ditanya baru, bakani ku asai ati iya ngambi pemutus peresa kediri, nadai disempulang apai indai, Suzzane madah diri udah teleba jauh ari apai indai kenyau ari mit suba.

“Aku udah teleba jauh ari apai indai. Maya belajar di Kuching suba, aku sigi diau ba buding,” ku iya.

Ba Aniq Razim Yoong B.Mohd Danial Yoong, ke penakan China Melayu madahka ba pemagas belajar, enda tau enda bisi inisiatif belajar enggau pengeransing enti deka bulih pemutus peresa ke nyulut.

“Enti deka bulih pemutus ke nyulut, enda tau enda belajar enggau bebendar, tang enti naka ‘ok-ok’ aja, baka nya meh pemutus kitai belajar naka ‘ok-ok’ aja,” ku Aniq ke pechayaka kuasa enggau disiplin.

Aniq ke kala besekula di Kolej Abdilla di Petra Jaya, sereta bulih

7A+ enggau 2A madahka iya ngarap diri ulih masuk Pra-Universiti laban deka belajar pasal pengawa berubat (Medicine).

“Diatu, bedau berunding enggau apai indai, sekalika aku patut ngambi ‘Foundation’ dulu, tauka ‘A-levels’ dulu. Tauka nguji meda ni bagi universiti ke bisi nyendiaka kus perubat,” ku iya ke ngarapka bisi sekularsip ke ulih dipinta iya.

Aniq mega enda gagit ati deka belajar di menua luar, laban kus bekait enggau perubat ulih diambi di universiti menua tu, ku iya.

“Nyamai agi aku nyambung pelajar aku ba universiti menua tu empu, laban aku enggai jauh apai indai aku sereta kami sebilik.

“Tambah mega ekonomi diatu enda tentu manah, nya alai, manah agi belajar dalam menua,” ku iya, ke nyendiaka diri belajar bebulan sebedau peresa, lalu ba iya, meseti mendingka utai ke diajar pengajar.

Author:

Facebook Comment