Pemujur atur PRK Tanjong Datu dipuji Chairman SPR



Chairman Komiti Pengawa Bepilih (SPR) Malaysia Datuk Seri Mohd. Hashim Abdullah tepantup ati enggau pemujur atur Pengawa Bepilih Mit(PRK) Tanjong Datu ke baru udah tembu.

Ku iya, PRK ke diadu kena 18 Februari nya nadai napi sebarang pengurang sereta nerima kerejasama manah ari semua ejensi ke bekaul.

“Nadai pengurang ba PRK Tanjong Datu tu tadi, semua dipejalai enggau mujur. Ari sukut pengelikun, SPR nerima kerejasama manah ari polis.

“Pemujur PRK tu deka nyadi chunto endur kitai napi pengawa bepilih besai ti deka datai,”ku iya ba aum pengarang berita pengudah makai tengahari ngerami orang gawa PRK Tanjong Datu di Lundu kemari.

Dulu agi ari nya, Hashim ngulu ‘post mortem’ PRK Tanjong Datu ke diatur di Opis Pelilih Lundu ti bela digulu Direktor SPR Sarawak Datuk Takun Sunggah.

Asil ‘post mortem’ ku Hashim, SPR bisi tetemu sekeda pekara ke patut di kemanah sereta ditambah jemah.

“Pekara baru ke ditemu kitai ba PRK tu iya nya sentang tuduh sekeda orang ngagai SPR.

“Bisi tuduh nya positif lalu bisi mega negatif, ke postif udah tentu deka diau diri lalu ke negatif udah tentu deka dipansutka ba media rama.

“Pekara tu meseti diterangka kitai enggau nenak ketegal tuduh negatif tu datai ari orang ke ba politik tauka NGO. Rayat mudah pechaya,”tandu Hashim.

Ngenang kaul bukai, Hashim madah SPR semampai sedia enti Pengawa Bepilih Besai Sabah diadu ba awak ke semak tu.

SPR ku iya udah sedia barang maya ke alai latih sereta simulasi sigi diatur ninting bulan.
“Ari sukut logistik kitai udah sedia, ba semua bengkah pengawa dikena napi pengawa bepilih besai pan kitai usah sedia,” ku Hashim.

Facebook Comment