PKR udah nyendiaka chalun ungkup PRK DUN Tanjung Datu


Parti Keadilan Rakyat (PKR) Sarawak udah sedia mantaika nama chalun parti nya bediri ba sitak N.3 Tanjung Datu, pengudah Opis Pengawa Bepilih (SPR) baum sereta mansutka penerang, ti dipelaba deka baum sehari tu.
Ketuai Parti Keadilan Rakyat (PKR) Sarawak Baru Bian madah, beserimbai enggau Pengawa Bepilih Mit (PRK) Tanjung Datu ti disadang deka diatur enda lama agi (pengudah pemidang ADUN sereta ti mega Kepala Menteri Sarawak, niang Datuk Patinggi Tan Sri Adenan Satem), PKR udah sedia deka mantaika nama chalun sida.
Baru ti mega ADUN Ba’kelalan lebuh dikerandau pengarang berita nengah ‘whatsapp’ kemari madah:
“Kami (PKR) deka madah enti SPR udah baum lalu deka madahka ni maya PRK nya diatur, nyengkaum nganti ketuai pemesai menua udah baum,” ku Baru.
Taja pia, antara nama ti disadang diasuh bediri maya PRK Tanjung Datu tu ila ari sepiak Barisan Nasional (BN) nyengkaum dua iku anak niang Datuk Patinggi Tan Sri Adenan Satem empu, iya nya Aziz Adenan enggau Azizul Adenan, tang bisi mega nyebut ex-Pemesai Pelilih Menua Lundu suba ti mega kala nyadi Pribit Sekeretari Adenan ke mangku pengawa nyadi Direktor Yayasan Sarawak, Azmi Bujang.
Taja pia, orang ke nyilih niang Adenan nya ila bepanggai ba pemutus Parti Pesaka Bumiputera Bersatu (laban kerusi Tanjung Datu diempu PBB).
Bisi mega ke berita madahka nama bini niang, Datin Patinggi Datuk Amar Jamilah Anu, deka diangkat bediri ba sitak nya tang berita selebubu madahka Jamilah nadai ati deka masuk politik.
SPR deka ngatur aum khas bekaul enggau pemuang kerusi DUN Tanjung Datu.
Nitih ku sebuah portal, chairman SPR Datuk Seri Mohd Hashim Abdullah madahka SPR udah nerima pemadah pasal pemuang kerusi Tanjung Datu ari Speaker DUN Sarawak, Datuk Amar Asfia Awang Nassar, ensanus.
Kerusi DUN N.3 Tanjung Datu puang berindik ari pemidang penyandang sitak nya, niang Datuk Patinggi Tan Sri Adenan Satem, kena 11 Januari tu tadi.
Mohd Hashim mega bisi madahka aum khas nya deka baumka pekara bekaul enggau PRK DUN N.3 Tanjung Datu, nyengkaum haribulan Nganjung Nama, Hari Muai Ngundi (Tumu), Hari Muai Undi, Rikod/Rintai Nama Orang ke Ngundi ti deka dikena maya PRK nya nyengkaum penyendia bukai ti ungkup PRK nya.
BP

Facebook Comment