PKR MATAK DIRI BEDIRI BA PRK TANJUNG DATU - Randau Sarawak

Breaking

Sunday, January 29, 2017

PKR MATAK DIRI BEDIRI BA PRK TANJUNG DATU



KUCHING: Parti Keadilan Rakyat (PKR) nadai nganjung chalun bediri ba Pengawa Bepilih Mit (PRK) Tanjung Datu ti deka diatur kena 18 Februari tu.

Chairman PKR Sarawak, Baru Bian madahka pemutus nya digaga laban berundingka sekeda pekara, iya nya bebasaka pengawa ex-Kepala Menteri, niang Datuk Patinggi Tan Sri Adenan Satem.

Dalam timpuh nya mega, PKR deka betatika strategi sida iya lebuh napi Pengawa Bepilih Besai (PRU) Ke-14 ti dipelabaka deka diatur taun tu.

Baru ti mega Kaban Kunsil Nengeri (ADUN) Ba’ Kelalan madahka PKR menua beratika penemu niang Adenan ke lebih agi ngemerat rayat Sarawak pengudah iya mangku pengawa Kepala Menteri suba.

Niang Adenan ku iya, enggau penegap iya berani negika hak Sarawak baka ke udah ditulis dalam Sempekat Malaysia 1963 sereta berani negapka pengarap di menua tu pekara (nadai tatak milih jalai pengarap) lalu deka ngaga Jaku English nyadi jaku kedua dikena di Sarawak.

Iya mega ku iya, sepenemu enggau PKR baka minta royalti minyak enggau gis kitai ditambah ngagai 20 peratus, dipinta ari Perintah Besai lalu meri kelala 22 Julai nydi hari ke besai ungkup nengeri Sarawak.

Ku iya baru, mayuh pengawa udah digaga niang Adenan konsisten enggau visyen, peneka sereta manifesto PKR menua ke lebih agi ‘Deklarasyen Kuching’ ti diberi kelala kena 12 September 2012.

“Nya alai, ketegal nya PKR menua nengah aum ‘Majlis Pemimpin Negeri (MPN)’ sepenemu ngaga pemutus enda bediri dalam PRK Tanjung Datu,” ku iya madah ba aum media di Indu Opis PKR menua ditu, ensanus

Sama bisi enggau ngulu aum media nya kemari, Mandal chairman PKR Sarawak See Chee How enggau Sapit Chairman MPN ke baru, iya nya Abdul Jalil.

Iya madah pemutus ke dijapai kemari siti pemutus ke ‘konklusif’ laban PKR renggat nasional nyerahka pemutus nya ngagai MPN.

Iya mega madahka PKR enda mantu barang parti penyakal bukai tauka orang ngatika diri ke deka bediri nyatupchalun Barisan Nasional (BN) ba PRK Tanjung Datu laban nya enda setipak enggau peneka parti.

Ku Baru, pemutus PKR nya siti ari kelai ti deka meda Kepala Menteri ke baru, Datuk Amar Abang Johari Tun Abang Openg enggau Perintah Nengeri majakka pengawa tauka atur ke udah diberi tetapka niang Adenan.

“Pekara tu ke kedeka kami digaga Abang Johari enggau Perintah Nengeri dalam timpuh berapa bulan tu ila tauka taun tu ila.

“Kami nemu engka bisi orang ke enda setuju enggau pemutus ke digaga kami enda bediri di Tanjung Datu tang nya patut diperatika nengah penemu ke besai agi, iya nya beratika penyendia napi PRU enda lama agi,” ku iya.

Opis Pengawa Bepilih (SPR) udah netapka 4 Februari 2017, hari ngantung nama ke PRK Tanjung Datu, 12 Februari (hari mengundi tumu) lalu hari ngundi 18 Februari.

PRK Tanjung Datu diatur berindik ari pemidang penyandang kerusi nya, niang Adenan 11 Januari tu tadi ketegal betapi enggau penyakit tungkul ati.

No comments:

Post a Comment