PERANAK MENUA KAPIT NERIMA MANAH KM KE BARU DICHIRI


KAPIT: Peranak bagi menua Kapit endang andalka Kepala Menteri (KM) Sarawak ke baru dichiri iya nya Datuk Amar Abang Johari Abang Openg sereta ngarapka iya ulih neruska pemansang ke udah digaga niang Datuk Patinggi Tan Sri Adenan Satem.

Juruaudio Visual Opis Pemadah Kapit, Marvin Juti Tini madahka iya endang meri pengarap ti besai deka meda nengeri Sarawak tu terus maju ari baruh pegai KM ke baru tu lalu ulih neruska juluk ati niang Tok Nan ti deka meda menua tu mansang seriris enggau nengeri di Semenanjung Malaysia.

“Pengarap aku ngagai Kepala Menteri Sarawak ke baru,ngambika ulih ninga penusah rayat, ngembing sereta nulung rayat ke begunaka bantu ari perintah nengeri.

“Tu beguna bendar kelebih agi ungkup kitai rayat nengeri Sarawak begunaka pemansang lalu deka meda nengeri tu seiti nengeri ke maju kelebih agi ba kandang menua pesisir.

“Kandang menua pesisir agi mayuh begunaka pemansang ba sukut infrastruktur baka jalai, bekal ai beresi, kuasa elekterik enggau ke bukai lalu semua tu meseti dikemansang lebuh menua tu deka nyapai juluk menua maju,” ku iya.

Kelimpah ari nya, iya bearap bendar deka meda Kepala Menteri Sarawak ke baru tu suah agi ngelawa kandang menua pesisir ngambi sama betatika penusah ke diasai rayat ba menua pesisir.

Kelimpah ari nya, Marvin mega meri pengaga ati iya ke pengawa niang Tok Nan ke udah mayuh ngaga pemansang ba nengeri tu.

Aku mega deka meri besai terima kasih ngagai niang Tok Nan laban udah mai mayuh ubah ke manah sereta nulung rayat ba nengeri tu. Terima kasih ngagai niang lalu pengawa ti udah digaga iya endang seruran kami kenang.

Iya seiku ketuai ke chukup dikerindu rayat laban iya seruran ninga sebana rayat sereta iya mega seiku ketuai ke ulih mai ubah ti manah enggau pemansang ke digaga iya deka dipeda rebak nembiak dudi hari ila,” ku iya nandu.

Seiku peranak asal menua Kapit, Laura Empas madahka iya endang pechaya ngagai Kepala Menteri ke baru ulih ngubah atur pemansang ba nengeri Sarawak tu.

Aku arapka Kepala Menteri Sarawak ke baru tu ulih ngisi pemuang niang Kepala Menteri Sarawak ke lama sereta lebih mayuh tranformasyen ke dibai perintah nengeri ungkup menua kami ba menua pesisir tu.

Kami ngarapka iya nyadi seiku ketuai ke ulih ngembing rayat enggau lurus baka ke udah. Pemidang niang Tok Nan chukup ngenyinuka rayat ba nengeri tu kelebih agi niang ti udah mayuh ngemai pemansang.

Taja pan bakanya kami tetap pechaya sereta nyukung semua pemansang ke deka dibai ketuai kitai ke baru tu,” ku iya.

Tebal agi, peranak menua pesisir endang randaka pemansang ngambi ulih ngempitka seraka enggau kandang menua di mengeri. Beserimbai enggau tu, sebarang pemansang ke ulih pulaika pemaik rayat endang dikearap ke peranak ba Kapit sereta tanggungpengawa KM ke baru iya nya neruska projek pemansang ke udah dilangkar niang Tok Nan.

Author:

Facebook Comment