PENATAI BANGKAI NIANG ADENAN BA RUMAH IYA DISAMBUT ENGGAU ATI KE CHUKUP SINU


SANTUBONG: Gaya ba rumah Datuk Patinggi Tan Sri Adenan Satem di Damai Jaya di Santubong ditu lemai kemari  penuh enggau penyinu ati nganti penatai bangkai niang Adenan, ke datai urung pukul 7 lemai, kemari.

Bala pemesai, ketuai opis sereta bala kaban belayan niang Adenan berengkah datai ba rumah iya urung pukul 3.30 lemai.

Van bangkai ke mai niang Adenan ari Palan Tungkul Ati Sepital Besai Sarawak di Kota Samarahan, datai ba rumah iya urung pukul 7 lemai, ti mega disempulang bini iya, Datin Patinggi Datuk Jamilah Anu enggau sida sebilik.

Sama bisi nyambut penatai bangkai niang Adenen ba rumah iya kemari, Sapit Kepala Menteri Datuk Amar Abang Johari Tun Openg enggau ke bukai.

Bangkai niang Adenan deka dibai ari rumah iya urung pukul 10 pagi tu, ngagai Masjid Jamek, Petra Jaya lalu deka ditumbakka ba Tanah Pendam Islam Samariang, pengudah Solat Zohor.

Atur pengawa meri basa ke penudi ngagai niang, ti diungkup ngagai bala pemesai enggau mensia mayuh berengkah ari pukul 10.45 pagi ngagai 12.45 tengahari.

Rayat Sarawak nerima berita ke pemadu nengenyit sereta ngenyinuka ati enggau pemidang Datuk Patinggi Tan Sri Adenan Satem urung pukul 1.24 lemai kemari.

Niang Adenan ngapuska seput iya ba Palan Tungkul Ati Sepital Umum Sarawak di Kota Samarahan, ketegal komplikasi tungkul ati.

Author:

Facebook Comment