Lagu ‘Lelaki Teragung’ ba AJL 31 dituju khas ngagai niang Tok Nan


Penanyi Dayang Nurfaizah Awang Dowty tauka tebilang agi enggau nama Dayang Nurfaizah deka meri basa ngagai ex-Kepala Menteri (KM) Sarawak, Niang Datuk Patinggi Tan Sri Adenan Satem, lebuh ti deka mai lagu ‘Lelaki Teragung’ maya malam pengerami Anugerah Juara Lagu 31 (AJL 31) ti deka diatur ba Putra World Trade Centre (PWTC) Kuala Lumpur, kena hari Minggu tu ila.
Dayang Nurfaizah, nengah sebuah surat berita nasional madahka iya deka mai lagu tu enggau naka pemanah dikena meri basa ngagai niang ke lebih dikelala  enggau nama ‘Tok Nan’.
Dayang Nurfaizah, 35 taun entara penanyi Sarawak ke mujur sereta udah lama dalam bidang seni madahka, lagu ‘Lelaki Teragung’ deka disada ke iya lalu dituju ngagai niang Tan Sri Adenan Satem.
Nama lagu ‘Lelaki Teragung’ enti disalin ngagai Jaku Iban iya nya ‘Lelaki Tebilang’, lalu lagu tu entara 12 buah lagu ke deka dipekitka ngerebut gelar ‘Juara Lagu’ di AJL 31, ke digaga sereta ditulis Natasyah enggau Iman Imran.
Taja pia, peminat Dayang Nurfaizah minta iya ngayanka sekeda gambar niang dalam video lagu nya. Tang taja pia, dalam timpuh ke pandak tu ku iya, pedis deka ngulihka video gambar nya.
Iya nandu baru madah ngagai peminat sereta rayat Sarawak, lagu tu endang ungkup niang Tan Sri Adenan.
Dalam jaku Dayang Nurfaizah nengah randau enggau surat berita nasional, ku iya:
“Aku pan berasai sinu laban iya (niang Tan Sri Adenan Satem) udah ninggalka kitai. Iya entara tuai pemesai ke chukup manah, lalu pemidang iya, sigi dikenang belama. Aku ada di Sarawak, lalu baka rayat Sarawak bukai, aku pan berasai chukup sinu,” ku iya.
Nengah laman rama ‘Facebook’ sereta ‘Instagram’ iya, mayuh peminat minta iya mandangka gambar niang lebuh iya mai lagu nya ila, lalu bisi mega sekeda madahka enti enda sempat ngaga video gambar, chukup meh enti sema ngengkahka gambar niang ba atas panggau aja.
“Ba aku enti semina ngengkahka gambar niang baka nya aja bedau ngemantupka ati laban mayuh pengawa besai udah digaga iya ke kitai Sarawak. Maya bisi awak dudi hari ba pengawa ke endang ungkup meri basa ngagai ‘Tok Nan’, aku deka sama enggau kita, meri basa ngagai iya,” ku Dayang Nurfaizah.

Facebook Comment