JEMATAN LANANG TAU DISILIH ENGGAU NAMA ADENAN


 
Perambu tu engkeman dipenyadi dikena ngingatka rayat Sibu beterima kasih ngagai niang

SIBU: Ngenang pemanah enggau pementas niang Kepala Menteri Datuk Patinggi Tan Sri Adenan Satem dia bala ketuai raban bansa sitak Sibu ngarapka Jematan Lanang tau disilih ngagai nama niang Adenan.

Temenggong Stanley Geramong madah, perambu tu engkeman dipenyadi dikena mandang ngingatka rayat Sibu beterima kasih ngagai niang.

“Kebuah pia laban Jematan Lanang tu mega keterubah iya jematan ke digaga niang nadai ngena tol laban niang balat ngemeratka pengelikun enggau pengelantang pengidup rayat,” pia ku iya madah ngagai pengarang berita, kilah ensana.

Dulu agi tu iya Geramong betuaika bala ketuai raban bansa enggau tuai rumah Iban meri basa kepenudi ngagai niang Adenan ba Dewan Suarah Sibu ditu.

Pengerami ngelai tol ba Jematan Lanang tu dikemaduka dipenyadika niang kena 24 Mei 2015.

Jematan tu belabuh dikena mensia mayuh ari taun 2006 alai sida ke ngena motosikal mayar tol RM0.50, kerita (RM3), van (RM5) lori enggau bas (RM10).

Berebak enggau tu, Pemancha James Semilan bela mantaika penemu ngarapka sebengkah kelai tauka monumen tau digaga di Sibu ditu dikena ngenang niang Adenan.

Iya madah, kelai tu deka nejuka mensia mayuh lebih agi baka rebak baru semampai ngenang niang ti mayuh budi ngagai rayat enggau nengeri tu.

“Monumen tu mega nyadi kelai ngagai nengeri Sarawak ti kala dipegai seiku pemesai ti landik sereta dikesayau genap iku rayat,” pia ku penemu James.

Tuai Rumah Juing Buntok ti bela berandau enggau pengarang berita madahka iya nyukung penemu Opis Kaunsil Sibu iya ke deka ngaga nama Stadium Tetutup Sibu ngena nama niang Adenan.

“Ba aku penemu tu manah lalu patut disukung.

“Sekumbang ke nyadi Kepala Menteri niang udah mayuh amat mai pengelantang ngagai rayat enggau pemansang di mengeri Sibu,” ku Juing.




 

Author:

Facebook Comment