Tanah NCR bisi penanggul deka disukat dudi


Pengempu tanah Adat Bansa Asal (NCR) dikeingatka sereta dipinta terus meri kerejasama ngagai Opis Tanah enggau Survei (JTS), dikena nentuka pengawa nyukat tanah ngena inisiatif baru di nengeri tu mujur dipejalaika.
Menteri Pengatur Pengeraja Asal enggau Rampa Menua II, Datuk Amar Awang Tengah Ali Hasan madahka, pengawa nyukat tanah NCR nya enda ulih dipejalaika sereta tekala nya sereta deka dipejalaika bererenggat nyentukka tembu disukat magang.
“Proses nyukat tanah tu dipejalaika bererenggat nitihka bagi ke patut dikemeratka dulu, nya alai pengari rayat enggau peranak tauka pengempu tanah bisi tanggungpengawa besai meri kerejasama ngagai JTS baka meri penerang bagi ke bedau disukat awakka ulih ditusun gintir.
“Ngagai genturung pendiau tauka pengempu tanah ke enggai meri kerejasama ngagai JTS, dia atur pengawa nyukat tanah ba endur nya deka diketu lalu JTS deka mindah nyukat ngagai genturung pendiau bukai, nya gerah ari aku.
“Ba taun baru (2017) dikena nyukat tanah NCR Inisiatif Baru enggau nyukat Kampung Tradisional, kitai udah bulih ungkup belanja sepenyampau RM30 juta, lalu tu deka mantu kitai neruska pengawa tu ke meri penguntung ngagai semua,” ku iya.
Awang Tengah mansutka pekara nya lebuh ti bejaku ba Pengawa Nyuaka Chek Pampas Tanah, Surat Geran Tanah Seksyen 18 Kanun Tanah Negeri (Kpg Tradisi) enggau Gazet Rizab Komunal Bumiputera, Menua Samarahan ke diatur JTS ba Dewan Suarah ditu, kemari.
Ku iya, projek ngemesaika genturung pendiau mega nerima ungkup belanja besai ari perintah, ti nyadi projek ti tebilang ba ujung mengeri enggau menua pesisir.
“Nengah chara tu perintah ulih mantu raban bansa lebih agi sida ke kurang penatai pemisi,” ku Menteri Pemansang Industri enggau Orang Dagang, Pengawa Dagang enggau Puku.
Bekaul enggau surat pala tanah di baruh Seksyen 18 KTN (Kpg Tradisional) iya madahka, Kampung Tradisional iya nya genturung pendiau ke lama udah ditumbuhka sekalika udah digazet nyadi Tanah Komunal Bumiputera tauka bedau digazet.
Atur ti dikemeratka dalam pengawa nyukat Kampung Tradisional iya nya lebih ngagai genturung pendiau ke udah lama ditumbuhka sereta ngembuan perengka guna mensia mayuh baka jalai alun, klinik , sekula enggau kebukai.
“Surat pala tanah di baruh Seksyen 18 KTN ke diberi ngagai Kampung Tradisonal iya nya geran ke nadai ungkus mayar premium, ungkus nyukat enggau nadai mayar geran surat pala tanah lalu timpuh pengempu geran nya diempu selama iya.
Kelimpah ari nya, Awang Tengah ngelalau penerima chek pampas tanah nya ngambika ngena duit nya ngena chara ke patut baka dikena melanja sekula anak.
Penerima surat pala tanah dialau ngambika enda ngembuan runding ke pandak sereta patut nyaga surat pala tanah enggau manah, laban dalam kandang endur ti benung mansang baka Samarahan bisi pemar bulih tanah, ku iya.
Nitihku iya, naka ke diatu perintah udah mujur nyukat kandang endur pemesai 749,134 hektar enggau 5,543 lot individu ba kandang endur ti pemesai lebih 6,200 hektar.
Kemari, Awang Tengah nyerahka 72 cek pampas tanah sepenyampau RM8.057 juta ngagai 66 penerima ti kena bungkur projek Kampung Bangka Semong/ Melayu Extension Scheme, Samarahan enggau projek Kota Samarahan Industrial Estate, Samarahan (Phase 2), ti ba pemesai tanah 54.906 hektar.
“Seharitu bisi 26 surat pala tanah seksyen 18 Kanun Tanah Negeri udah dikeluarka asil ari Program Pengukuran Kampung Tradisonal ti mungkur Kampung Tanjung Tuang,” ku iya ti seraya nyuaka Warta Rizab Komunal Bumiputera ngagai Kampung Entingan.

Facebook Comment