Sepuluh NGO nerima RM100,000.00 ari Adenan


Kepala Menteri Datuk Patinggi Tan Sri Adenan Satem enggau bini iya, Datuk Patinggi Datuk Amar Jamilah Anu sedia belagu nguluka bala mayuh enggau kompeni nyuaka belanja, dikena mantu gerempung pengelantang pendiau baka ke digaga ba Pengerami Mantar Hari Krismas sereta Nyuaka Bantu ngagai NGO ba Dewan Jamilah, Yayasan Sarawak ditu, kemari.
Beserimbai enggau Hari Krismas ti deka datai tu, Adenan kemari udah nyuaka RM100,000.00 ngagai sepuluh buah Gerempung Ukai Dikuasa Perintah (NGO)
Penyampau duit nya diulih ari pengawa Kepala Menteri empu enggau bini iya, Datuk Patinggi Datuk Amar Jamilah Anu belagu, ke dipelanja opis, gerempung enggau ejensi ke bisi digulu Kepala Menteri enggau bini  semanjai taun tu ke disua ngagai Yayasan Sarawak.
Penyampau duit ke diulih seduai ari pengawa belagu nya manggai lebih RM11 juta, ari semua pengerami ke bisi digulu Kepala Menteri enggau bini iya, nyengkaum RM5 juta ari ‘Naim Charity Dinner’ ti diatur di Miri dalam bulan September tu tadi.
“Orang rindu meda Kepala Menteri enggau bini iya sama richah enggau bala mayuh belagu, nya alai aku pan sedia sereta lantang ati belagu enti mensia mayuh deka melanja lagu ti disadaka aku.
“Semua duit ti diulih ari belagu nya diberi ngagai gerempung pengelantang pendiau memagang, baka ke seharitu (Pengerami Mantar Hari Krismas sereta Nyuaka Bantu ngagai NGO). Awakka semua pengawa pengelantang sereta pengasih ke baka tu meri penguntung ngagai NGO di menua tu.
“Seharitu pan, enti bisi sesapa ke deka melanja lagu, aku sedia belagu ke kita awakka aku dikelala enggau nama ‘Kepala Menteri Sarawak ke Rindu Belagu’,” ku Adenan madah lebuh bejaku ba Pengerami Mantar Hari Krismas sereta Nyuaka Bantu ngagai NGO di Dewan Jamilah, Yayasan Sarawak ditu, kemari.
Ba pengerami nya kemari, sepuluh buah NGO nerima bantu nya baka PIBAKAT, Palan Aktiviti Pengandai Kuching enggau Samarahan (PAWE), Sarawak Heart Foundation, Gerempung Buah Pinggang Sarawak, Gerempung Orang Buta Sarawak, Gerempung Nembiak Sakit Riman Sarawak, Gerempung Pengelantang Pendiau Hope Kuching, Malaysian AIDS Foundation, SABATI enggau Kelab Carnation.
Ba pengerami nya kemari mega, bini Kepala Menteri, Datuk Patinggi Datuk Amar Jamilah Anu mega bisi magi duit bantu ngagai urung 52 iku nembiak ari ‘The Salvation Army’.
Sama bisi enggau nerima bantu Hari Krismas iya nya bala pengereja pengawa Yayasan Sarawak ke deka ngintu Hari Krismas, ditangkan enggau pengawa kepala menteri enggau bini iya disempulang bala ketuai bukai nyirap dagin manuk kulok pangang ke kelai ngintu Hari Krismas.
Sama bisi ngulu pengerami nya kemari, Pemangku Sekretari Perintah Menua (Transformesyen Ekonomi) Datu Abu Bakar Marzuki, Direktor Yayasan Sarawak, Azmi Bujang, Pro-Cancellor UiTM Datuk Safri Awang Zaidel, enggau Presiden Petronesa Trading Sdn Bhd, Datuk Abang Abdul Karim Tun Openg.

Facebook Comment