Semua kunteriktor diberi peluang ti sama ba pengawa ngaga Pan Borneo Highway



Semua piak kelebih agi kunteriktor ari bemacham kelas diberi awak ti sama bela ba pengawa ngaga Projek Jalai Besai Pan Borneo (PBH) enggau atur bisi ngerejista enggau Lebuhraya Borneo Utara Sdn Bhd (LBU).
Menteri Kereja Raya, Dato Seri Fadillah Yusuf madah projek tu bisi pakej-pakej ti tau ngasuh kunteriktor ari Kelas F ngambi awak dalam projek ngaga Pan Borneo.
“Ba dalam LBU, bisi Unit Pemansang Bumiputera deka ngambi penerang ari KKR, Kaunsil Pemansang Industri Pengawa Berumah Malaysia (CIDB) enggau Opis Kepala Menteri dikena nyerenih kompeni-kompeni ke layak diundi tauka diberi tinda,” ku iya.
Kaban Parlimen (MP) Petrajaya mansutka jaku tu lebuh bejaku ba Pengerami Makai Lemai Beserimbai Ngintu Genap Taun Ke-30 Balai Dagang Bumiputera Sarawak (DUBS) pampang Miri malam kemari.
Ambi ke chunto ku iya, chabut undi ungkup kunteriktor Kelas F ba pengawa ngaga penyangkai bas sepemanjai Pan Borneo dipejalai dikena meri awak ngagai kunteriktor bumiputera ulih ngaul diri dalam projek tu.
“Semanjai jalai besai tu ila deka digaga penyangkai bas, jejantas, jematan enggau ke bukai, nya kebuah aku madah awak ungkup kunteriktor ari bemacham kelas diberi sama bela ari Kelas A nyentuk F dikena ngemujurka projek besai tu,” ku iya nerang.
Taja pia ku iya, kunteriktor ke bisi ati ngaul diri dalam projek tu patut nangkup kriteria tauka peminta sereta rejista nyadi atur enggau diaku.
“Semina kompeni ke mujur diserenih deka dikangau ngundi tauka tinda lalu tu awak ti tau diambi piak kunteriktor ngambi bagi dalam pakej-pakej Pan Borneo,” tandu iya.
Fadilah mega besetuju DUBS ngaul kerejasama enggau CIDB ngatur kus ti tau meri awak ngagai bumiputera dikaul dalam projek perintah.
“Aku nyukung kus ngatur pekara wang, ngatur projek enggau ke bukai bekaul enggau industri pengawa berumah ngambika sida nemu kriteria enggau peminta projek pengawa berumah,” ku iya.
Fadilah berebak enggau nya mega ngemendarka geran Projek Mit Pemansang Menua Pesisir (MRP) ngagai DUBS Miri dikena bejalaika aktiviti.
Sama bisi datai MP Sibuti, Ahmad Lai Bujang, Kaban Kunsil Nengeri (ADUN) Lambir Ripin Lamat, Chairman DUBS Sarawak, Datuk Abang Helmi, Chairman DUBS Miri, Abdul Samat Mohamad All.

Facebook Comment