Peranak GP Stum Muda gaga nyambut Krismas laban nadai agi napi suntuk ai


Hari Krismas 2016 meri besai reti ngagai 125 buah rumah ti mungkur urung 700 peranak Genturung Pendiau (GP) Stum Muda, laban ti nadai agi betapi enggau penanggul suntuk ai.
Nya berindik ari pemujur enggau penemu projek bekal ai ba GP Stum Muda ti dipejalaika iMalaysia Sarawak, ke udah dipenyadika ensanus ulih Chairman Kaunsil Penyanding Penemu 1Malaysia Sarawak (1MSAC) Datuk Joseph Salang Gandum, ensanus.
Enggau kerejasama iM Sarawak, pengawa nukar sistem paip Polyvinyl Chloride (PVC) lama ngagai paip HDPE tiga inchi sepemanjai 10 kilometer, berengkah ari pun tekat ngagai GP, udah meri pengelantang ngagai peranak GP nya.
Sebedau tu peranak GP nya betapi enggau penanggul suntuk ai ketegal paip ti bisi pantis, hari kemarau enggau mayuh orang ngena lebuh maya bukai.
Peranak GP ngelama tu bepanggai ngagai sistem bekal ai ‘gravity fed’ ti digaga dalam taun 1980-an suba.
Ketuai GP, GP Stum Muda, Lebob Sindeh madahka, penembu projek bekal ai nya meri penguntung enggau pengelantang ngagai 125 buah ruang bilik ti nyengkaum bansa BIdayuh, Cina enggau Melayu, laban ti nadai agi betapi enggau penanggul suntuk ai.
“Diatu kami bisi bekal ai ti chukup sereta pemadu manah dibandingka enggau sebedau tu ke selalu betapi enggau suntuk ai ketegal paip pantis tauka pechah sereta maya musim kemarau kami teputus bekal ai.
“Diatu kami bisi tekad ai ke digaga di bukit lalu disambung terus ngena paip ke udah diganti sepemanjai 10 kilometer ke GP,” ku iya lebuh dikerandau pengarang berita maya ti mai raban tu meda paip nya dalam kandang GP Stum Muda.
Nambahka nya, KaunselorPelilih Menua Lundu, Gom Boyat, 56, madahka tekad ai nya ulih mekal urung 5,000 ngagai 10,000 liter ai ke lalu ulih dikena dalam timpuh ke lama.
Gom madahka dikena nentuka bekal ai seruran bisi, pengawa ngemanah tauka meresi deka dipejalaika dua kali setaun iya nya bulan Mei enggau Disember, sebedau pengerami Hari Gawai enggau Hari Krismas.
Kelimpah ari nya, Nohim Noes, 51, enggau Ribka Mering, 45, madahka diri gaga ati sereta beterima kasih ngagai perintah ti udah nyendiaka bantu projek bekal ai nya.
Seduai iya bepenemu penemu projek nya, dia sida iya ke indu ti bebela lebih agi maya Hari Krismas ke deka datai tu, nadai betapi enggau penanggul suntuk ai.
“Penemu projek tu meri pengelantang ngagai kami lebih agi kami indu ti bebela, berapi maya ramabu bisi pengerami. Kami mega nadai penanggul suntuk ai maya deka mandi,” ku iya.
Angelia Teddy, 16, seiku rebak baru GP nya mega madahka diri gaga ati sereta beterima kasih ngagai iM Sarawak enggau Kaban Parlimen Mas Gading laban ti nyendiaka projek bekal ai nya.
“Enti sebedau tu pengawa tiap hari baka bebasu sereta berapi mesti bisi penanggul tang diatu projek tu udah tembu kami nadai agi betapi enggau suntuk ai.
“Sebedau tu, aku selalu jarang pulai ke rumah laban diasuh apai indai diau ba sekula, laban di rumah betapi enggau penanggul suntuk ai,” ku iya ti besekula ba Sekula Sekondari (SM) Teknik Sejingkat.

Facebook Comment