PENGAWA DAGANG BA CIQ BIAWAK TEJANGGAL KETEGAL PROJEK TI APIN TEMBU



LUNDU: Peranak ke diau ngelingi CIQ Biawak, kelebih agi di Kpg Biawak dekaka projek ngaga Pasar Pendaja Adan Menua  Kpg Biawak ditembu enggau lengkas.

Projek ke dipungkal ba bulan Mei 2014 nya patut tembu digaga ba bulan March 2015, tang diatu kereja mengkang dipejalai.

Ketuai Kampung (KK) Kpg Biawak, Juak anak Domek madah projek nya meseti ditembu enggau lengkas ketegal dikearap tau nyadi palan pengerembai ekonomi peranak ke diau ngelingi.

“Diatu, orang dagang ke diau ngelingi CIQ Biawak nadai endur bedagang.

“Pasar lama Kpg Biawak diatu udah enda ditengah orang agi pengudah CIQ dibuka lima taun ke udah.

“Kitai ngarap perintah meratika enggau berat projek nya, lalu ditembu enggau lengkas,”ku iya bejaku ngagai pemberita rambau program Randau Pengelikun Adan Menua Nengeri Sarawak 2016.

Program ke diatur di Balai Mayuh Guna Kpg Biawak nya dipenyadi Peribit Sekretari Kaban Parlimen(MP) Mas Gading (Datu Anthony Nogeh), Sumi anak Likie.

Juak nambah, pasar pendaja nya ila deka dulu dibuka ngagai peranak tauka orang dagang ke diau ngelingi CIQ Biawak.

Enti bisi agi puang, nya baru kitai meri peluang dagang nya ngagai orang luar, tandu iya.

Ngenang sentang randau ke diatur Majlis Keselamatan Negara (MKN) nengah kerejasama Opis Residen Kuching enggau Opis Pelilih Lundu, Juak pechaya ulih ngiri penerang sentang tanggungpengawa enggau servis ke bisi disedia ijinsi.

Entara ejensi ke bisi ngulu randau iya nya Opis Menteri Dagang Dalam Menua, Koperasi enggau Pekara Bebeli Barang (KPDNKK),Komiti Penyeliah Ulah Makai Suap Malaysia (SPRM), Soldadu Malaysia (ATM), Kastam enggau SPRM

Author:

Facebook Comment