Perintah deka ngatur RWMF 2017 begulai enggau raban peribit



Festival Muzik Kampung Ujan Sedunya (RWMF) ke berengkah diatur ba taun baru (2017) ila deka mai penyereta ari raban peribit nyadi komiti pengatur pengerami, begulai enggau Opis Menteri Pengawa Dagang Temuai, Seni enggau Adat Pesaka (KPKK) ke seruran diatur entara Julai ngagai Ogos ninting taun.
Sapit Kepala Menteri Datuk Amar Abang Johari Tun Abang Openg madah dijangka sebedau ujung taun tu, pemutus ni bagi kompeni peribit ke deka nyereta KPKK ngadu RWMF 2017 deka ditemu.
“Naka kediatu, kami benung beratika ni bagi peribit ke deka begulai enggau KPKK nengah Sarawak Tourism Board (STB),” ku Abang Johari.
Iya madah munyi nya pengudah ngarika Kepala Menteri Datuk Patinggi Tan Sri Adenan Satem mungkal Kongres Gerempung Konvensyen enggau Kongres Antarabansa (ICCA) Ke-55 ba Palan Konvensyen Borneo Kuching (BCCK) ditu, ensanus.
Abang Johari mega madahka pelin RWMF 2017 ila iya nya maya minggu RWMF, selampur Mengeri Kuching deka diias enggau kelai pengerami kampung ujan.
“Tu pekara ke baru laban setipak enggau mengeri besai Kuching nyadi mengeri seni, ke udah lama deka digaga ari suba.
“Nya alai, perambu tu agi ba renggat perambu bakani deka ngubah Kuching nyadi mengeri seni laban nyerumba atur mayuh pengawa besai  baka ICCA, bengkel muzik antarabansa sereta kampung ujan ke ngembuan tuju ke sebaka, iya nya ba program betikas entarabansa ke digaga di Kuching,” ku iya.
Sebedau ujung taun tu, iya madah, sapa ke deka  bekerejasama enggau KPKK ngatur RWMF deka ditemu pemutus ujung taun tu.
Ngenang pasal penyampau penatai temuai ke Sarawak, naka tu ku iya, bisi nambah taja pan dipelaba dalam bulan Mei taun tu tadi, kilah ke ujung taun, penatai temuai bisi kusut mimit  ketegal musin landas.
“Tang diatu penyampau nya udah belinsur betambah baru. Aku bisi ke Mulu bedau lama tu tadi, lalu penyampau temuai raun ke Mulu mega nambah, lebih agi rayat ari menua China ke datai nengah Brunei sereta sekeda ari Kota Kinabalu (KK), “ ku iya, seraya madah penyampau nya udah manggai urung 29,000.
“Seiti ari pemujur nya laban Sarawak bisi penerebai terus ngagai Kuching, iya nya ari Hong Kong,” ku iya.
Baka pekara bekait enggau Visa ku iya, Perintah Sarawak setuju meri pas khas ngagai temuai ari menua China enggau India ke Sarawak.
“Kami besetuju meri pas khas ngagai temuai ari China enggau India ke datai nengah Brunei.
“Temuai ari menua China ke datai nengah Brunei (Brunei pan meransang temuai ari menua China nemuai ngagai menua sida iya), sida iya ngelawa Mengeri Seri Begawan (BSB) dulu, sebedau ngerembuska diri kitu.
“Pengelama ngaga Visa dalam kandang lima hari aja…Nya alai, nadai penanggul ngagai Opis Menteri Dalam Menua (KDN) laban kuasa Imigresen nya kuasa nengeri,” ku iya.

Facebook Comment