Awakka polis nasat silik kes nya dulu

KUCHING: Sapit Kepala Menteri Datuk Amar Douglas Uggah madah, awakka polis nasat dulu kes nyadi ba sebuah kebun di Ulu Sg Arip, Balingian, Mukah ti ngujungka seiku lelaki parai kena timbak.

"Aku bedau entu nemu pasal kes nya, nama utai ke nyadi…Awakka polis nasat dulu, udah nya ila baru kitai nemu kebuah," ku Uggah.

Iya ditanya pengarang berita bekait enggau kes ke bisi nyadi di Ulu Sg Arip ke ngujungka seiku parai lalu nitihka pemadah ari polis kemari, tiga iku udah ditangkap sereta deka diriman.

Bekait enggau kes nya, ripot polis madahka udah nangkap tiga iku orang ke dipelaba ulih mantu pengawa tasat bekaul enggau pemati seiku lelaki ti dipelabaka ditimbak ngena senapang patah ba penama jalai ngagai kebun di Ulu Sungai Arip, Balingian, Mukah kemari.

Kepala Polis Sarawak Datuk Mazlan Mansor madah ketetiga iku lelaki ti ditangkap nya berumur dalam antara 20 ngagai 30 taun ti dipelabaka kaling lelaki ditimbak, dikearap ulih mantu tasat nya.

"Kes nya nyadi pengudah seraban lelaki nguji tama ngagai palan nya ke alai sida udah ditagang peranak ba genturung pendiau dia ti ngujungka penyarut nyadi antara sida.

"Ketegal nya seiku ari seraban ke nguji tama ngagai lalu ditimbak ngena senapang patah ngujungka lelaki nya parai.

"Naka ke diatu, polis benung nasat kes tu lalu agi tumu endar deka madah asil tasat, tang endar, kami udah nangkap tiga iku lelaki, lalu deka dikangau mantu kami nasat kes tu," ku iya.

Kelimpah ari nya, Mazlan ngelalau mensia mayuh enda ngerembaika berita selebubu ke tau ngachau pengelikun mensia mayuh.

"Anang ngena laman sosial ngerembaika berita lalu ngangatka agi berita tu.

Sebarang pengawa salah ngerembaika berita tu tau diukum nengah Seksyen 505 (b) Kanun Keseksaan," ku iya ke minta mensia mayuh meri kerejasama ngagai polis.

"Awakka kami Polis ngaga pengawa kami," ku iya.

Nitih ku berita pasal kes nya, dua iti seterum ari senapang patah bisi ditemu besemak enggau bangkai, lalu endur penusah nya nyadi ba penyauh 100 meter ari endur raban nay ke ditagang komuniti rumah panjai tama.

Bankai lelaki ditimbak nya dikelala enggau nama Fabian Janti, 26, udah dianjung ngagai Sepital Sibu, ngambika dibuntas ditasat dulu.


Facebook Comment