Perintah Nengeri komited ngemansangka rayat - Randau Sarawak

Breaking

Wednesday, September 28, 2016

Perintah Nengeri komited ngemansangka rayat


Pemujur ngaga Tekat Hidroelekterik (HEP) Murum udah ngayanka perintah nengeri seruran komited ngemansangka peranak nengeri tu kelebih agi sida ti diau di kandang menua pesisir, ku Tuai Megai Menua (TYT) Tun Pehin Sri Abdul Taib Mahmud.
Ku iya, tekad ke dulu digaga ba nengeri tu baka Tekad Batang Ai enggau Tekad Bakun udah ngubah tikas ekonomi peranak ke diau ngelingi kandang menua nya kelebih agi sentang peluang pengawa, pia mega industri kedua ke bukai.
“Aku pechaya enggau pemisi Tekad Murum baka ke dipeda kitai diatu ulih mujur ngubah nasit komuniti Penan ke mega peranak asal kandang menua Murum tu.
“Tu nengah palan baru ke manah sereta teatur kelimpah peluang pengawa, pelajar enggau ekonomi ti udah diatur perintah dikena mantu sida ngubah tikas pengidup,” ku iya lebuh ti bejaku bejadika HEP Murum di Belaga ditu, kemari.
Sama bisi datai ngulu pengerami tu iya nya Sapit Kepala Menteri Datuk Amar Douglas Uggah Embas enggau Tan Sri Datuk Amar James Jemut Masing, Menteri Perengka Guna Mensia Mayuh Datuk Dr Stephen Rundi Utom, Menteri Pengatur Pengereja Asal enggau Rampa Menua Kedua Datuk Amar Awang Tengah Ali Hasan, Kaban Parlimen (MP) Hulu Rajang Datuk Wilson Ugak Kumbong, Kaban Kunsil Nengeri (ADUN) Belaga Liwan Lagang sereta Ketuai Pemesai Eksekutif Sarawak Energy Datuk Torstein Dale Sjotveit.
Seraya madahka pengawa ngaga Tekad Murum tu ngena ba maya ti engkeman, Tun Taib pechaya operasyen tu deka nyukung bekal elekterik ba Koridor kuasa Ulih Dikena Baru Sarawak (SCORE) lalu berebak enggau nya, ulih nyendiaka peluang pengawa ungkup peranak ke diau ngelingi kandang menua nya kelebih agi komuniti Penan ditu.
“ Tu ti kitai (perintah) inginka iya nya pemansang seriris enggau peminta sereta guna rayat ke alai semua deka teulihka asil ari nya seraya ngangkatka tikas sosio-ekonomi sida belama,” ku iya madah.
Ku iya nerang, pengawa ngadaka bekal elekterik ti tegap deka narit mayuh agi pengeluar puku ari bemacham industri ti ulih nyungkak pemansang ekonomi nengeri tu.
Ba jaku iya, Tun Taib mega muji pengawa Kepala Menteri Datuk Patinggi Tan Sri Adenan Satem ke neruska penyulut pemansang Sarawak.
“Nama ti diperatika aku, Adenan udah mandangka tikas pengawa ti nyulut sekumbang nganti penuduk Kepala Menteri, lalu aku ngarapka rayat terus meri sukung ke nadai besiping ngagai kuasa perintah iya,” ku iya.
Dulu agi ari nya, Adenan ba jaku iya madahka pengawa ngaga Tekad Murum iya nya singkang ti keterubah dikena ngemansangka peranak ba kandang menua Murum, Belaga laban tu chara ti engkeman dikena ngangkatka tikas sosio-ekonomi peranak ba kandang menua Hulu Rajang.
Ku iya, enti kelia peranak Murum napi penusah ngangkatka tikas ekonomi sida ketegal akses jalai ti jauh, diatu komuniti Penan ditu udah ulih ngasaika pemansang berindik ari jalai alun ke udah disediaka ti ngambung semua sitak nya.

No comments:

Post a Comment