Semua menua pesisir deka disambung jalai alun



Sarawak begunaka belanja urung RM24 billion dikena ngaga jalai alun, awakka ulih nyambung semua kandang endur kelebih agi menua pesisir di nengeri tu lebuh manggai ba taun 2030 ila.
Sapit Kepala Menteri Tan Sri Datuk Amar Dr James Jemut Masing madah, nya entara pemar ke ditapi opis menteri iya enggau Opis Kereja Raya (JKR) Sarawak dalam timpuh 15 taun ke deka datai tu.
“Kitai (opis menteri enggau JKR) deka nentuka semua kandang endur di Sarawak ulih disambungka ngena jalai alun dibaruh R1, R2, R3 enggau R5 lebuh manggai taun 2030.
“Dikena ngenukuka semua kandang endur di serata Sarawak  disambung jalai alun, penyampau belanja ke dikena ngemansangka dalam timpuh 15 taun ke deka datai iya nya urung RM24 billion.
“Ditu aku deka ngansak perintah besai meri ungkup belanja enggau kuasa ngagai nengeri tu (opis menteri enggau JKR) bejalaika projek nya, dikena nentuka semua nya ulih dipejalai nitihka ti udah ditimpuhka,” ku iya madahka diri arap bendar opis menteri enggau JKR ulih ngemansangka jalai alun nya.
Masing ti mega Menteri Pemansang Infrastruktur enggau Perengka Pengangkut, mansutka pekara nya dalam aum pengarang berita, pengudah nemuai ngagai Indu Opis JKR Sarawak sereta mendingka penerang bekaul enggau projek opis nya, ke diatur ba opis nya ditu, kemari.
“Enti autonomi nya di beri ngagai kitai, kitai ulih nentuka nama ti pemadu manah ungkup Sarawak kelimpah ari ke nemu sapa bagi konsultan enggau kunteriktor ke ulih bejalaika pengawa nya.
“Pemadu beguna kitai ulih matau projek nya lebuh benung dipejalaika,” ku iya.
Kelimpah ari nya Masing muji JKR ti udah chakah sereta mujur bejalaika urung 900 lebih projek ke nyengkaum projek jalai alun dalam Langgur Pemansang Malaysia Lumpar Ke-10 (RMK-10).
Berindik ari penyulut nya iya arap bendar opis nya ulih mujur bejalaika projek pemansang ke diperambu dipejalaika dalam RMK-11, lima taun ke deka datai tu.
“Bepelasarka pemujur projek ke dipejalaika dalam RMK-10 (ti urung lebih 80 peratus tembu), udah tentu opis tu nadai penanggul bejalaika projek dibaruh RMK-11.
“Nya alai kitai amat ngarapka ungkup belanja nya patut diberi terus ngagai JKR nengah kuasa perintah besai ngambika projek pemansang nya muntang agi dipejalaika sereta ulih nyaga kunteriktor lalu nentuka bagi konsultan,” ku iya.
Lebuh ke dipinta ngenang pasal pejalai projek Jalai Besai Pan Borneo, iya madahka semua 11 pakej udah dipejalaika enggau lanchar lalu naka ke diatu nadai betapi enggau sebarang penanggul.
Sama bisi dalam aum pengarang berita nya kemari Sekreteri mendam opis menteri nya Safri Zainuddin, Direktor JKR Sarawak Ir. Zuraimi Sabki enggau ke bukai.
BP

Facebook Comment