Lima iku chalun terus sah diterima masuk PBB


Lima iku Kaban Kunsil Nengeri (ADUN) ke udah nyadi chalun terus Barisan Nasional (BN) sah nyereta Parti Pesaka Bumiputera Bersatu (PBB), ti ngujungka penyampau semua kerusi Kunsil Nengeri (DUN) parti nya bisi 45 ari 72 kerusi.
Kepala Menteri ti mega Presiden PBB, Datuk Patinggi Tan Sri Adenan Satem madah, lima iku ADUN ke diterima dalam PBB nya, diterima nitihka prinsip.
Lima iku ADUN iya nya Rosey Yunus (Bekenu) enggau Paulus Palu Gumbang (Batu Danau) ke sebedau tu enggau Parti Tenaga Rakyat Sarawak (TERAS) sereta Miro Simuh (Serembu), John Ilus (Bukit Semuja) enggau Gerawat Gala (Mulu) ti sebedau tu kala pansut ari PBB laban ti bediri minta pilih nyadi chalun terus BN.
“Kami udah ngaga pemutus nerima nengah prinsip peminta lima iku YB ke minta nyereta PBB. Pekara silik bekaul enggau pekara tu deka ditentuka udah tu nitihka prosedur,” ku iya ngenukuka pekara nya dalam aum pengarang berita ke diatur ba bilik aum Ringkat 22 Wisma Bapa Malaysia ditu, kemari.
Bejaku baru, Adenan madahka taja pan PBB bisi pengelebih ba kerusi iya nya ari 40 kerusi nambah nyadi 45 kerusi DUN,  tang PBB tetap bekunsi kuasa enggau parti komponen ke bukai.
Nambahka nya, lebuh ti ngenang ADUN Pakan Tan Sri William Mawan Ikom ti mega nyadi chalun terus BN sereta menang ba PRN Ke-11, iya madahka Mawan bedau ngaga sebarang pemutus.
“Bekaul enggau Mawan, iya minta lebih timpuh berundingka kuing diri.
“Sekalika (iya milih enggau PBB tauka parti bukai) nya bepanggai ba iya (Mawan) empu. Nya pemutus iya,” ku Chairman BN Sarawak.
Mawan sebedau tu ti kala nyadi Presiden TERAS tang bepilih nyadi chalun terus BN ba PRN Ke-11, udah ningkilka diri ari parti nya (TERAS).
Sama bisi dalam aum pengarang berita nya kemari, Sapit Kepala Menteri ti mega Mandal Presiden Kanan PBB Datuk Amar Douglas Uggah Embas, Sapit Kepala Menteri ti mega Sapit Presiden PBB Datuk Amar Abang Johari Tun Openg enggau Sekretari Besai PBB Datuk Dr. Stephen Rundi Utom. 
BP

Facebook Comment