Isu petronas enda ibuh dibalut enggau politik


Isu bekaul enggau pengereja pengawa nyengkaum isu 13 pengereja pengawa ari Sarawak ba Petronas enda ibuh dibalut enggau politik, tang patut dipeda ari kededua piak.
Chairman Kongres Kesatuan Sekerja Malaysia (MTUC) Sarawak, Ibrahim Hamid madahka isu lebih pengereja pengawa, nusun sereta struktur baru enggau ngererak kompeni endang ukai pekara baru dalam sektor peribit.
Iya bepenemu pekara ke nyadi dalam Petronas patut ulih diperatika ari kededua piak.
“Ba penemu aku, enti deka lebih ngemeratka rayat Sarawak gawa dalam Petronas, sida nya patut diasuh tauka dianjung gawa ba endur bukai dalam sektor nya. Ba aku nya chara ti chukup muntang mutarka isu tu.
“Lalu bekaul enggau pangku pengawa pakar, ke patut iya pangku pengawa pakar nya tebuka ngagai semua. Enti nadai rayat Sarawak ulih ngisi pangku pengawa nya enda ngawa, enda patut pangku pengawa nya diteju puang nadai diisi. Kitai patut ngambi orang ari luar ke bisi pengelandik.
“Nambahka nya peluang mai masuk pemeranak puku ari kompeni multinasional tauka dunya tama kitu mega deka tekeruga enti ngeluarka atur baka nya, ke lalu mega ulih meri empas ngagai industri dagang temuai kitai,” ku iya.
Ibrahim mansutka penerang nya lebuh ke ngenang isu bekaul enggau 13 iku pengereja pengawa ari Sarawak ke diketuka gawa ba Petronas, lebuh dikerandau raban pengarang berita kemari.
Pekara ke sama mega bisi dikenang iya maya meri jaku pengelalu ba Aum Besai Tiga Taun Sekali (TDC) MTUC Sarawak 2016 ke diatur ba sebengkah hotel ditu, kemari.
Kelimpah ari nya bepelasarka penerang ke diberi ngagai pengarang berita kemari bekaul enggau isu ke sama, MTUC bepenemu bala politik di menua tu tekala nya dulu ari Petronas sereta Perintah Sarawak enggau jampat madah ngetuka permit kereja ukai peranak Sarawak ba Petronas.
Bekaul enggau isu Petronas nya, ke diketuka permit nya ukai peranak Sarawak tang agi peranak Malaysia, ku penerang nya.
“Nama kebuah enda ngetuka permit bepuluh ribu pengereja pengawa ari menua luar sereta agi enda ibuhka pengereja pengawa ari menua luar ke datai enggau nadai pemendar?.
“Peluang gawa patut bepelasarka pengulih gawa lalu ukai bepelasarka sekalika pengereja pengawa nya ari Sarawak tauka Semanjung Malaysia,” ku penerang MTUC nya.
Sama bisi datai ba pengerami nya kemari Sekretari Besai MTUC, N Gopal Kishnam enggau Sekretari MTUC Sarawak Division, Andrew Lo enggau ke bukai.
BP

Facebook Comment