Endur suspek ti rari ke Australia bekaul enggau kes munuh Bill Kayong udah temu


Opis bekuasa Australia udah nemu endur  seiku suspek ke digiga polis bekaul enggau pengawa munuh ex-Sekretari Parti Keadilan Rakyat (PKR) pampang Miri, Bill Kayong.
Pekara nya dipadah Komisioner Australia ke Malaysia Rod Smith, taja pia  iya enggai madahka pekara nya silik agi laban kes benung dalam proses undang-undang di Australia.
Ku iya baru, pengawa mai pulai suspek ke Malaysia bepanggai ba proses undang-undang.
“Awakka proses undang-undang nya dipejalaika dulu. Aku enda ulih mantaika pekara nya enggau silik,” ku iya madah ba aum media, pengudah betemu enggau Kepala Menteri Datuk Patinggi Tan Sri Adenan Satem di opis Kepala Menteri ensanus.
Ba atur pengawa PDRM beserumpu enggau media ba pengerami ‘Hi-Tea’ ti diatur ba Mes Pemesai di Opis Indu PDRM, Jalai Badaruddin ditu,ensanus, Kepala Polis Sarawak Datuk Mazlan Mansor lebuh dikerandau pasal pekara nya madah, Polis Sarawak lalu bedau nerima sebarang timbal ari Interpol tauka ari Perintah Australia bekaul enggau endur suspek ke begelar ‘Datuk’ nya ke bisi kaul enggau kes munuh Bill Kayong.
“Nya ari pemadah sida(Australia), tang kami (PDRM) agi nganti riput ke amat ari sida, lalu dalam timpuh ke sama nya mega kami agi bekerejasama enggau Interpol ari sukut undang-undang,” ku Mazlan.
Kelimpah ari nya, Mazlan mega madahka proses nangkap sereta mai pulai ‘Datuk’ nya enda ulih dipejalaika polis ditu, ketegal atur kuasa undang-undang.
“Tu penanggul kuasa enggau undang-undang, proses (nangkap sereta mai pulai) ukai dalam kuasa menua tu, enggai enda pan enda kitai nitihka undang-undang Interpol,” ku iya.
Seiku ari dua iku suspek ke digiga polis, Lee Chee Kiang tauka dikelala enggau nama Datuk Stephen Lee dipelabaka rari ke Australia.
Kena 18 Ogos tu tadi, suspek Chin Wui Chung udah nyerah diri ngagai polis, disempulang luyar iya ba Balai Polis Krokop, ti ngujungka semina Lee enggau seiku agi suspek, Kong Sien Ming mengkang lepas.
Polis Sarawakudah minta bantu Interpol (polis antarabansa) ngiga suspek ke munuh Bill Kayong, ti ditimbak ba simpang lampu trafik Lutong di Miri kena 21 Jun tadi.
Sapit Ketuai Kanan Opis Nasat Pengawa Salah Sarawak (CID) Datuk Dev Kumar madahka orang ti dipelaba munuh Bill Kayong nya ditemu rari ke Melbourne, Australia nengah Singapura, kena 3 Julai tu tadi.
Kena 15 Julai tu tadi, sekeda suspek, Mohamad Fitri Pauzi, 29, didawa munuh Bill Kayong, lalu orang kedua iya nya Lie Chang Loon, 37, didawa bisi kaul enggau kes nya.
Berindik ari kes bunuh nya, polis numbuhka raban ‘task force’ ke diambi ari pemesai Opis Nasat Pengawa Salah Bukit Aman enggau Sarawak bejalaika pengawa nasat nya.
Semilan iku nyengkaum seiku indu, 22, ditan ba sekeda endur di Miri ngambika ulih mantu polis ba pengawa nasat nya. Tujuh iku dilepaska pengudah penerang diambi ari sida.
Polis mega bisi ngerampas senapang patah, dipelaba senyata dikena munuh Bill Kayong, ari rumah seiku ari kededua ke dituduh nya.
Bill Kayong, 43, tauka nama Islam iya, Mohd Hasbie Abdullah, seiku aktivis sosial ti negika hak kelebih agi bekaul enggau isu tanah, di timbak mati ari semak seiku orang ke enda dikelala,ba lampu trafik besemak enggau Palan Komersial Emart, Tudan kena 21 Jun tu tadi.
Bill, ke kena timbak nya lalu parai dia udah siti das nimbak iya ditujuka ngagai iya, kena cheremin kerita lalu kena pegu kanan iya (baruh pending kanan).
Maya penusah nya nyadi dalam urung pukul 8.30 pagi , Kayong ke deriba kerita 4WD Toyota Hilux benung dalam pejalai ari rumah iya di  Desa Senadin nuju opis iya ba pasar Miri.
Ba pengawa bepilih besai nengeri 7 Mei tu tadi, niang Bill Kayong bediri ngelaban chalun Barisan Nasional (BN) di Bekenu, Rosey Yunus, tang alah.
BP

Facebook Comment